🎈一連兩日市集推廣，同囡囡一齊做宣傳 💪🏻

呢個週末，我哋一班媽媽帶埋小朋友一齊去咗荃灣南豐紗廠擺市集，宣傳「近D玩」平台 🦒🎪。
近排為咗籌備平台，有時候我會出咗去做嘢。
囡囡 Ella 一見我出去，就會問我：「媽咪你去做乜嘢啊？」👀

我嘗試同佢解釋媽咪出去工作係做啲乜嘢，但大人嘅工作對小朋友嚟講可能太抽象 💼。
今次，我終於可以帶佢感受吓媽咪嘅工作係點樣，俾佢睇吓我平時掛喺口邊嘅「近D玩」，原來唔只係一個名字，而係一件真真實實、會同人連結嘅事 💛。

Ella 一去到就好快投入。

派單張 、派小禮物 、拎住 QR code 牌叫姨姨叔叔 scan ，每一樣都做得好認真。
最令我印象深刻嘅，係佢對嗰塊 QR code 牌緊張到不得了，整個下午都唔願意放低 😂。

我望住佢認真嘅樣子，心入面有一種好安靜嘅感動 💓。

小朋友未必完全明白大人嘅工作，但佢哋會感受到當中嘅氣氛，記住自己有份參與，記得自己係一份子；呢個工作可能好微不足道，但對於小朋友嚟講係一件超級大事 🌟係同媽咪一齊完成嘅大事呀！👩‍👧

Ella 一邊派禮物一邊同我講：「媽咪～我又幫手～媽咪 I love you」💖

收檔嗰陣，Ella 好開心咁話：「媽咪，我哋聽日又再嚟過呢度派禮物啦」😆🎉

有時候，親子之間最動人嘅時刻，未必需要刻意營造，而係一齊站喺同一個空間 ，一齊望住同一件事，一齊做一件平凡但真實嘅小事。

嗰種連結，唔大聲，卻好實在 🤍。

夜晚臨瞓嗰陣，我同 Ella 一齊睇故事書 。
故事書中間有一段問：「你暑假有乜嘢活動呀？」
佢就一輪嘴咁講：「我去游水 、我去畫畫 、我去跳舞 、我去 scan QR code！」😆
我聽到嗰陣真係忍唔住笑咗出嚟 😂。

有時我會諗，做媽媽之後，工作同家庭之間係咪好難取得平衡 ⚖️？
今次之後，我反而覺得，或者唔一定。

如果生活可以打開少少，如果小朋友可以走入我嘅工作世界 ，工作就唔再只係大人嘅事，而係可以變成一家人共同擁有嘅記憶 👨‍👩‍👧。

原來一段工作經歷，有孩子在場，會變得特別有溫度 🥰。

喺人來人往之間 ，悄悄留下屬於我哋嘅一段窩心記憶 💌。